Os traballos deseñáronse en función do tipo de obra, a xeolocalización e delimitación dos xacementos identificados como lote 23, incluídos nos 11 concellos da Comarca de Vigo, para o cal se planeou unha intervención de prospección arqueolóxica intensiva.
As tarefas de prospección arqueolóxica que realizou a empresa A Citania Arqueoloxía realizáronse cunha aplicación de SIX instalada sobre un dispositivo móbil que permitiu ao persoal técnico en campo ter acceso á propia base de datos, con capacidades de crear novos xacementos arqueolóxicos, en caso de documentar algún novo elemento do Patrimonio, ou ben modificar e actualizar a información requirida na catalogación, como son tipo de delimitación, estado de conservación...
Ademais da toma de atributos para cada un dos bens, os xacementos delimitáronse desde a propia aplicación móbil. Esta documentación realizouse emparellando o dispositivo móbil a un GPS submétrico, mediante os sistemas de wifi ou bluetooth incorporados ao GPS, polo que se contou coa precisión esixida nos pregos do traballo.
